قصه مشوقه

استغفري ربك واوبقي حاسبي علي كلامك من إهنه ورايح لأن لا يلفظ من قول إلا وعليه رقيب عتيد. 
حاضر ياشيخ عمار إستغفر الله العلى العظيم. 
ههملكم دلوك وهعتبر إنك وافقت على طلبي ياعم فتحي وانك باركت الجوازة وهعاودلكم بأمي على بعد المغرب عشان تطلب فاتن رسمي كيفعا كيف أي بنيه عياجوها خطاب.
بص عمار حواليه وشاف البيت نضيف متنقصهوش نضافه لكنه لما بصلها ولقاها بصت للأرض فهم. انها عايزه تنضفه من ۏسخ تاني غير ۏسخ التراب والغبار. 
اتبسم عمار برضى وطلع من البيت وهمل فتحي حاسس بمشاعر مخلوطة مابين فرحته بستر بته ومابين خوفه من غدرها وطبعها اللي معارفش ممكن يوديها ويودي عمار المسكين فين.. مع ان فاتن لغاية قبل ماتظهر مهجة فحياتها عمر الغدر ماكان من طبعها وكانت احسن بت في الدنيا لكن اكيد الطبع اتغير مع تغيير الاخلاق وغسيل العقل.

أما فاتن فبعد ماطلع الشيخ عمار وقفت في نص البيت وزعقت بعلو حسها
روايح ياروايح.. تعالي إهنه قوااام. 
روايح فزت من النوم وجاتلها جري
خير ياست جرا ايه عتزعقي ليه إكده وتصيحي من قبل مايفيق الزرزور 
عزعق من فرحتي ياروايح.. عارفه مين كان إهنه دلوك الشيخ عمار ياروايح إمام الجامع الشيخ عمار اللي ياما اتمنيته جه لحد باب بيتي وطلب يدي وعايز يتجوزني فى الحلال. دعوتي ربنا استجابها واتاري لسه فيه بيني وبين ربنا عمار وعيسمع دعوتي حتى بعد كل الذنوب اللي عيملتها وعصياني ليه واتري صوح باب التوبه عمره ماعيتقل ولو كانت الذنوب كيف الجبال.
صوح ياست فاتن طب والله فرحتلك من كل قلبي الحمد إن ربنا اخيرا هيتوب عليكي والله وحق الصبح الجديد اني كل يوم ادعيلك بالهداية وإن ربنا يبعتلك حد زين ينور بصيرتك ويهدي قلبك والحمد لله ربك استجاب ليا وليكي.. انتي زينه قوي ياست فاتن وقلبك طيب وطول عمري اقول انك خسارتك في السكه اللي انتي ماشيه فيها داي.
الف الحمد لله ياروايح.. يلا يلاهمي نضفي البيت من قزايز المدعوق اللي فيه وارمي كل حاجه عفشه وكسري الشيشه وخربي ركن
المزاج.. نزلي الستاير الحمره العفشه داي وافتحي الشبابيك وخلى هوا ربنا النضيف يدخل ويطهر البيت من اللي فيه.. ارمي الدربوكات والدفوف وكسري شرايط الاغاني ومعايزاش لا مره ولا راجل من النهاردة رجله تخطي البيت.. والبنات صحيهملي هديهم فلوس واقولهم يروحو يشوفولهم شغلانه نضيفه ياكلو منها عيش.. وزيعي في الناحية إن فاتن خلاص معادش ليها فسكة المشي البطال وتابت وتاب عليها ربنا.
اتحركت روايح بفرحة تنفذ الاوامر وفاتن جريت على اوضتها قعدت قدام مرايتها وابتدت تمسح وشها من البودره وتشيل الكحل من عينها وعلى ماخلصت بصت لروحها في المرايه وضحكت بفرحة ضحكت وهي واعيه فاتن القديمه البت البريئة بوشها الخالي من أي صبغه واي الوان وحست كأنها عاودت بالزمن لورا سنين. 
قامت راحت عالدولاب بتاعها ودورت فيه على حاجه واسعة تلبسها غير الديق المقسم اللي لابساه ديه لكنها ملقتش للأسف.. فقفلته ووقفت تفكر وبعدها راحت على أوضة ابوها دخلت وفتحت الدولاب وطلعت جلابية من هدوم امها اللي لساه ابوها محتفظ بيهم للنهاردة ورافض إن حد يروح ناحيتهم ولا يتخلص منهم طول السنين اللي فاتت. 
راحت على اوضتها جري ولبستها وعاودت اوضة ابوها ووقفت قدامه بيها وفتحي اول مابصلها وشافها شهق وهو مش مصدق عيونه. 
كانت نسخة من راضيه أمها واقفه قدامه شكلها وطولها وحتي ضحكتها وسأل روحه كيف ماكانش واخد باله من حاجه كيف داي قبل سابق 
أني دلوك بس حسيت إن فاتن بتي رجعتلي دلوك بس حسيت إن الجنيه اللي كانت لابساكي اتحرقت وماټت ورديتي انسيه وعاودتي من عالم الشړ يابتي. 
سامحني يابوي.. سامحني عشان ربنا يسامحني ويقبل توبتي.. اني محقوقالك ومحقوقه لروحي. 
ربنا يسامحنا جميعا يابتي ودلوك عايز اطلب منك طلب يافاتن.. الشيخ عمار هيخاطر بسمعته واسمه وكل حاجه تعز عالراجل خسارتها عشان يسترك كل الناس هتقفله وبالذات انه امام جامع وقدوه وعايزك يابتي تعينيه على حاله وتخليه يحس انه مخسرش لما اختار يسترك وانه احسن قرار خده.. صونيه وحبيه
وحطيه في عيونك عشان صدقيني اللي يعمل العمله اللي هيعملها معاكي داي يستاهل يتصان ويتشال فوق الراس.
ردت عليه فاتن وهي مبتسمه
متخافش يابوي وغلاوتك هحط عمار فعيوني التنين.
ومر يوم والتاني وجات ام عمار مع ولدها لبيت فاتن عشان تخطبها
ياولدي احنا لساتنا عالبر راجع حالك ياعمار دانت من ساعة ماقلت انك هتتجوز فاتن والناس كلت وشي وهياكلو وشك في الرايحه والجايه ياولدي راجع روحك. 
خلاص يمه اني عقدت النيه وعزمت واستخرت ربنا
خلاص ياولدي امر الله نافذ وانت حر عاد وعقلك في راسك.
طيب عايز دعوه حلوة يمه ابتدي بيها حياتي.
روح ياولدي ربنا يجعلها ليك خير متاع الدنيا يارب ويجيلك منها الخلف الصالح. 
الله يمه عالدعوه داي يارب تتقبل وتتحقق.
بس اعمل حسابك لو جالك الخلف الصالح الناس هتعايرهم بامهم.
فأما من تاب وأصلح يام عمار.
وتخيروا لنطفكم فان العرق دساس