قصه كامله مشوقه

الصدام ليس الحل الأمثل مع من مثلها ولكن تحارب الأفعى بالحيل والأحاجى ابتسمت لها وانا أحرك كتفايا فى لا مبالاله وكأن ذلك الامر لا يهمنى واستدرت تأهبا للنزول ولكن قبل ان اذهب القيت جملتى الاخيره التى تمنيت ان تنال بها قدرا كبيرا من الغيظ فيشفى غليلى
كان نفسى اقف معاكى اكتر ياداليا واستفيد من علمك بس نازله افرح الجماعه اصلى عقبال عندك نجحت ب 95 وان شاء الله استمر على كدا لحد
ماابقى مهندسه قد الدنيا وتخيلى بقى لما مرات عمر تبقى انسانه ناجحه والكل بيضرب بيها المثل اكيد هينولك من الحب جانب
قلتها وانصرفت محاوله ان ان تبدوا خطواتى ثابته ولكننى كنت ارتجف من داخلى واتخيلها تنقض على وتفتك بى ولكنى تركتها تثور تغيظا وسمعت صوت اصطكاك اسنانه ببعضها البعض فعرفت ان حديثى حقق ماكنت ارجوه منه هبطت للأسفل وأخبرت الجميع وكانوا سعداء جدا لنجاحى واتصلت بأمى أخبرتها فكانت سعادتها ضعفين فهيا تعلم اننى سأكون سعيده بهذا النجاح ولكن لم يغيب عن بالى لحظه ما فعلته داليا وكان لابد ان اعلم كيف فعلته
جلست معهم طيله اليوم حتى حل المساء فانصرفت لشقتى ومالبثت ان دخلت
حتى اجريت مكالمه هاتفيه كان لابد منها لفهم كل ماحدث ودار الحوار التالى
الو ازيك ياصفي
ازيك انتى ياميراس
مش كويسه
ياااه ميراس بتقول انها مش كويسه
مش انت ابن خالتى وعرضت عليا تساعدنى انا بتصل بيك وطالبه منه المساعده
رقابتى يابنت خالتى 
عندى مشاكل هنا وداليا مرات عمر مش سيبانى فى حالى وعملت معايا حاجه مش قادره اعرف هيا عملتها ازاى وعارفه ان مفيش غيرك هيفيدنى 
عملت ايه الست دى
عمر بعت لى رساله على تطبيق الواتس اب قبل ليله امتحانى وقالى انه هيعدى عليا يوصلنى للامتحان لكن محصلش ولقيته متغير من ناحيتى ولما سئلته عن السبب قالى انى بعت المحادثه لمراته علشان اوقع بينهم ودا محصلش لكن للاسف لقيت فعلا المحادثه مبعوته من تليفونى لتليفون داليا وهتجنن واعرف عملت كدا ازاى من غير ماتمسك تليفونى
ضحك صفي بصوت عالى قبل ان يجيب
شكلها كانت مطبقه على مسلسلات رمضان
انت بتقول ايه مش فاهمه حاجه وايه علاقه المسلسلات باللى بقولهولك 
اصل الموضوع دا سهل يتعمل وجه فى مسلسل قبل كدا وتقريبا كل الستات بتحاول تعمله 
ازاى !!
بسيطه اكيد داليا خدت منك تليفونك قبل كدا وكان معاها لاب توب 
ايوه فعلا خدته منى من فتره وقالت لى هتكلم اختها وقالت ان الشبكه تحت ضعيفه فهتاخده شقتها تتكلم منه وترجعهولى وفعلا رجعتهولى بعدها بنص ساعه تقريبا
طيب والواتس اب بتاعك معمول عليه باسوورد 
ياصفي هوا فيه بنت عندنا بتقدر تعمل باسوورد على تليفونها مانت عارف طه كان بيفتش تليفونى اول باول وكمان انا معنديش حاجه سر على التليفون
دا غلط ياميراس حتى لو معندكيش اسرار دا أمان بالنسبه ليكى ولازم تعمليه 
حاضر 
هيا داليا تقدر تفتح تليفون عمر 
لا خالص تليفون عمر ببصمه العين ومش بيسمح لحد يفتحه علشان عليه شغله وحساب البنك و اتصالاته مع الناس اللى بيشتغلوا معاه 
علشان كدا كان اسهل ليها تخترق حسابك لان تليفونك متاح ليها وكان دا من حسن حظها علشان تقدر تعمل فيكى المقلب دا
يلا نصيب طيب وبعدين
هيا بتاخد منك التليفون وتفتح تطبيق الواتس اب على اللاب توب بتاعها بتكتب رقم تليفونك وبيظهر لها باركود حاجه كدا عامله زى الرمز المشفر ولازم تمرر كاميرا الموبايل على الباركوود علشان يفتح كل الرسايل اللى على التليفون عندها على الاب وطبعا وقتها تقدر تشوف كل الرسايل وتبعت رسايل بأسمك كمان
يانهار ابيض طيب والموضوع دا مبيتكشفش
لا طبعا سهل جدا يتكشف بس لو متابعه الواتس بتاعك على طول هتلاقى ان فيه رسايل اتبعتت من عندك وانتى مبعتيهاش زى اللى حصل معاكى وهتلاقى رسايل جتلك ومعمول جمبها علامه القراءه وانتى متعرفيش عنها حاجه
للاسف الفتره اللى فاتت كانت فتره امتحانات وتميم كان تعبان ومكنتش بمسك التليفون اصلا 
اكيد هيا عارفه كدا واستغلت النقطه دى
طيب اخليها تطلع من حسابى ازاى
هقولك على حاجه هبعتلك فلاشه صغيره كل المطلوب منك انك تحطيها فى اللاب توب بتاع داليا لحد ماتفتح وتشيليها وخلاص
ودى بقى هتعمل ايه 
هتخلينى جوا لاب داليا اقدر اشوف كل حاجه عليه واقدر اخرج من الواتس بتاعك بسهوله واراقب اى اكونت بتفتحه من اللاب سواء فيس بوك او اى حاجه تانيه 
طيب هقدر اخدها منك ازاى
سهله هدور على اى ملزمه قديمه عندى والزقهالك بين الورق وهخلى احمد اخويا يعدى عليكى ويقول ان الاستاذ عبد المجيد بعتهالك وانتى تاخدى الفلاشه وتركبيها
بس مش عارفه ازاى هعمل كدا
مش عارف بقى بصراحه بس اتصرفى
اكيد كنت عارفه ان محدش هيفهم فى الحاجات دى غيرك بجد شكرا ياصفي
على ايه يابنت خالتى انتى
متعرفيش غلاوتك عندى
شكرته وأغلقت الهاتف وانا افكر فى طريقه اضع بها تلك الفلاشه فى حاسوب داليا فالواضح ان الطريق امامى طويلا وليس سهلا بالمره 
فى الصباح الباكر وجدت والده عمر تتصل على هاتفى