حب مجهول الهويه الفصل الثامن والعشرون كامل

وليه عندكم حرس
طارق بصلها في المرايا اللي قدامه وقال متقلقيش يا مدام بسمه دول للحماية مش اكتر.
بسمه سكتت وانا بصيت ل طارق ورجعت بصيت علي بسمه كان جوايا احساس قوي ان بسمه فيها حاجة مش طبيعيه. 
بعد وقت وصلنا القصر وبسمه شهقت بانبهار واول لما نزلنا من العربية لقيت بسمه بتقول بصوت مسموع معقول انتي عايشه في العز ده كله يا احلام!!
بصتلها پصدمة وبصيت ل طارق بأحراج وبسمه مكانتش شايفه قدامها وعينيها بتبص على القصر بطريقه انبهار غريبه وعينيها مكانتش بتتحرك اصلا هي مفتوحة جامد ومتثبته على القصر وبتتكلم بصوت مسموع من غير ما تاخد بالها مننا وانا حسيت بالاحراج من اللي هي عملته ده وطارق ابتسملي وقالها اتفضلي يا مدام بسمه مع أحلام هتوصلك اوضتك.
بسمه بصتله ورجعت بصت للقصر تاني وقالت انا هعيش معاكم هنا صح
اضايقت من الموقف المحرج اللي حطتني فيه وكلمتها وانا بضغط على اسناني بسمه حبيبتي تعالي اوصلك الاوضه اللي هتنامي فيها انتي وابنك شكلك تعبانه من السفر.
هزت راسها وهي لسه بتبص على القصر وقالت طب وشنطتي.
طارق رد عليها بهدوء متقلقيش اتفضلي انتي مع احلام والخدم هيطلعوها.
شهقت في وشي وقالت بفزع وكمان خدم!!
مسكتها من ايديها وقولتلها تعالي يا بسمه ندخل.
واخدتها ودخلنا القصر وكنت بمشي معاها بخطوات سريعه مش عايزة نقابل مرات عم طارق ولا عمه عشان ميقولش كلمة تضايقها ووصلتها اوضة رزان واول لما دخلنا الاوضه شهقت بانبهار تاني وقالت ايه ده يا احلام هما الناس دول عايشين ازاي! دا احنا جنبهم مش عايشين بقى.
رديت عليها بهدوء لا يا بسمه احنا جنبهم عايشين وكل حاجة وكفاية بقى انتي خليتي شكلنا وحش اوي قدام جوزي.. هيقول علينا ايه دلوقتي!
بسمه وهي بتقعد على السرير براحة وبتمسد بإيديها على مفرش السرير ايه العز ده كله يا احلام.. قصر وخدم والفرش من حرير.
رديت عليها بهدوء سيبك دلوقتي من الكلام ده وقوليلي انتي عملتي ايه مع الزفت جوزك ده قبل ما تيجي هنا
بصتلي پصدمة واتوترت بطريقة مبالغ فيها وقالت عملت معاه ايه يعني ايه قصدك ايه يا احلام
بصتلها بستغراب وقولتلها قصدي انتي هتسكتي على اللي هو عايز يعمله ده وهتسيبيه ياخد فلوسك كده يتجوز بيها
اتنهدت براحة كبيرة وانا كنت مستغربه ردود أفعالها وحاسه ان في حاجة غلط لان انا اكتر واحدة عارفه اختي وعارفه لما بتكون زعلانه مع جوزها بتكون عامله ازاي بس هي دلوقتي غريبه فعلا مش طبيعيه.
بسمه وهي بتبص حواليها على ديكورات الاوضه بانبهار مش عارفه يا احلام اعمل معاه ايه بس اديني هقعد معاكم هنا كام يوم افكر.
اتنهدت بحيره وانا ببصلها بستغراب وقولتلها ماشي يا بسمه زي ما تحبي.. هروح انا اوضتي تصبحي على خير.
سيبتها ورجعت اوضتي وانا لسه مستغربة وكان طارق غير لبسه وقاعد في الاوضه وحاطت اللاب بتاعه قدامه وشغال عليه وانا روحت قعدت جنبه وسندت براسي على كتفه وهو سألني بهدوء وهو بيبص على اللاب. 
طارق ايه يا حبيبتي الاوضه عجبت اختك.
رديت وانا سانده على كتفه ااه عجبتها.. بس مش عارفه يا طارق حاسه ان بسمه فيها حاجة غريبه.
طارق قفل اللاب وبصلي بدهشة وقال حاسه ان فيها حاجة غريبه ازاي
رديت عليه وانا محتارة مش عارفه بس بسمه اختي متغيرة و رد فعلها اللي شوفته ده مش طبيعي ابدا!! بسمه لما كان شاكر بس يخاصمها كانت بتفضل ټعيط وتتكلم كتير جدا وهي بتشتكي واحنا نهديها!! لكن
دلوقتي بتقول انه ضربها وانا مش شايفه اي اثار للضړب عليها وكمان متوتره كده!! في حاجة غريبه ومش فاهمه ايه هي!
لقيته بصلي باهتمام اوي وواضح انه بيفكر في كلامي وشرد شويه وبعدين ضمني في حضنه وهو بيبص قدامه بتفكير .... 
... يتبع 
تفتكروا طارق هيشك في بسمه بعد كلام احلام ده هنعرف الحلقة الجاية حبايب عايزين تفاعل جامد على البارت الهدية هنا